லஞ்ச ஒழிப்பு சோதனையில் சிக்கிய கால்நடை டாக்டர்கள்  

தமிழ்நாடு முழுவதும் தேர்வாணைய ஊழல் தொடர்பாக கால்நடை டாக்டர்கள், தேர்வு எழுதியவர்கள் வீடுகளில் அதிரடி சோதனை நடைபெற்றது.

தர்மபுரி மாவட்டத்தில் பாரதிபுரம் உள்பட 3 இடங்களில் சோதனை நடந்து வருகிறது. தர்மபுரி மாவட்டம் தொப்பூரைச் சேர்ந்தவர் கஜேந்திரவேலு. இவர் ஓமலூரில் கால்நடை மருத்துவராக பணிபுரிந்து வருகிறார். இவரது மனைவி சித்ரா.

இவர் தர்மபுரியில் கால்நடை மருத்துவராக பணிபுரிந்து வருகிறார். இன்று அதிகாலை இவர்கள் வீட்டில் லஞ்ச ஒழிப்புத்துறை போலீசார் சோதனை நடத்தி வருகின்றனர். தர்மபுரி செந்தில் நகர் செல்வகணபதி தெருவில் உள்ள கால்நடை டாக்டர் பத்மா வீட்டிலும் லஞ்சஒழிப்பு பிரிவு போலீசார் சோதனை நடத்தி வருகிறார்கள்.

பாப்பாரப்பட்டியில் உள்ள ஒருவர் வீட்டிலும் லஞ்ச ஒழிப்பு பிரிவு போலீசார் சோதனை நடத்தினார்கள்.   சேலம் மாவட்டத்தில் காடையாம்பட்டி, இளம்பிள்ளை மற்றும் அம்மா பேட்டை அருகே உள்ள நஞ்சம்பட்டி காலணி மற்றும் நாமக்கல் மாவட்டம் ராசிபுரம் பட்டணம் பகுதியிலும் டி.என்.பி.எஸ்.சி. மூலம் தேர்வாகி பணிபுரிபவர்கள் வீடுகளில் இன்று லஞ்ச ஒழிப்பு சோதனை நடத்தி வருகின்றனர்.

சேலம் அம்மாபேட்டையை அடுத்த நஞ்சம்பட்டி காலனியை சேர்ந்தவர் ராஜ்குமார். இவர் டி.என.பி.எஸ்.சி தேர்வு எழுதி இருந்தார். வீட்டில் யாரும் இல்லாததால் ராஜ்குமார் வந்தால் சேலம் லஞ்ச ஒழிப்பு பரிரிவு போலீசுக்கு நேரில் வருமாறு அவரது உறவினர்களிடம் கூறி விட்டு சென்று விட்டனர்.

அரசு கருவூலத்தில் வேலை பார்க்கும் இளம்பிள்ளை பகுதியை சேர்ந்த தியாராஜன் வீட்டிலும் இன்று லஞ்ச ஒழிப்பு பிரிவு போலீசார் சோதனை நடத்தினார்கள். இதே போல சேலம் மாவட்டம் ஓமலூரை அடுத்த காடையாம்பட்டியைச் சேர்ந்த பட்டதாரி ஆசிரியை ரேவதி வீட்டிலும் சோதனை நடத்தினார்கள்.  

திருச்சியில் உறையூர் பாண்டமங்கலத்தில் சம்பத் என்பவர் வீட்டில் இன்று காலை லஞ்ச ஒழிப்பு தடுப்பு பிரிவு டி.எஸ்.பி. அம்பிகாபதி தலைமையிலான குழுவினர் சோதனையில் ஈடுபட்டனர். முசிறி அருகே கோட்டத்தூரில் லோகநாதன் என்பவர் வீட்டிலும் லஞ்ச ஒழிப்பு போலீசார் சோதனை நடத்தினர். அரியலூரில் தியாகராஜன் என்பவர் வீட்டிலும் சோதனை நடந்தது.  

விருதுநகர் மாவட்டம் ராஜபாளையம் அருகே உள்ள எஸ்.ராமலிங்காபுரத்தை சேர்ந்தவர் அருளானந்தம் என்பவர் குரூப் 2 தேர்வில் தேர்வாகியுள்ளார். லஞ்ச ஒழிப்பு டி. எஸ்.பி. சியாமளா தேவி தலைமையில் லஞ்ச ஒழிப்பு போலீசார் அருளானந்தம் வீட்டிற்கு இன்று சென்று சோதனையிட்டு வருகின்றனர். அருப்புக்கோட்டை அருகே உள்ள ஆத்திப்பட்டியில் கண்ணன் என்பவர் குரூப்-2 தேர்வில் தேர்வாகியுள்ளார். அவரது வீட்டில் இன்ஸ்பெக்டர் விஜயகாண்டீபன் தலைமையில் லஞ்ச ஒழிப்பு போலீசார் சோதனையிட்டு வருகின்றனர்.

 சிவகங்கையில் 2 இடங்களிலும், காளையார் கோவிலில் ஒரு இடத்திலும், மானாமதுரை அருகே உள்ள ராஜகம்பீரத்தில் ஒரு வீட்டிலும் சோதனை நடக்கிறது. ராமநாதபுரம் மாவட்டம் மண்டபத்தை சேர்ந்தவர் பூவலிங்கம். இவர் வருவாய்த்துறை ஆய்வாளராக உள்ளார்.

இவர் கடந்த 2 ஆண்டுகளுக்கு முன்பு பணம் கொடுத்து வேலையில் சேர்ந்ததாக தெரிகிறது. இந்த புகாரின்பேரில் லஞ்ச ஒழிப்பு போலீசார் பூவலிங்கம் வீட்டில் அதிரடி சோதனை நடத்தினர். ஈரோடு சூளை பகுதியில் டி.என்.பி.எஸ்.சி. தேர்வு எழுதியவர்கள் வீடுகளில் லஞ்ச ஒழிப்பு போலீசார் அதிரடி சோதனையில் ஈடுபட்டனர்.

ஈரோட்டில் 5 இடங்களில் தேர்வு எழுதியவர்கள் வீடுகளில் சோதனை நடத்தப்பட்டது.   காங்கயம் அருகே உள்ள ஊதியூர் வேலாயுதம் பாளையத்தை சேர்ந்தவர் செந்தில்குமார். இவர் டி.என்.பி.எஸ்.சி. தேர்வு எழுதி தேர்ச்சி பெற்று இருந்தார். இவரது வீட்டில் லஞ்ச ஒழிப்பு போலீசார் அதிரடி சோதனை நடத்தினார்கள்.  

நெல்லை மாவட்டம் சங்கரன்கோவிலில் உள்ள திரு.வி.க. நகரை சேர்ந்தவர் சண்முகவேல். இவர் தமிழ்நாடு அரசு தேர்வாணையம் மூலம் குரூப்-2 தேர்வு எழுதி, வேலைக்கு தேர்வாகி உள்ளார். இவரது வீட்டில் லஞ்ச ஒழிப்பு போலீஸ் டி.எஸ்.பி. தங்கசாமி தலைமையில் போலீசார் அதிரடி சோதனை நடத்தினர்.

நேர்முக தேர்வு நடந்த சமயத்தில் சண்முகவேல் குடும்ப உறுப்பினர்களின் பேங்க் கையிருப்பு எவ்வளவு? அதற்கு முன்பாக பெரிய அளவில் பணப்பரிமாற்றம் நடந்துள்ளதா? என்று லஞ்ச ஒழிப்பு போலீசார் அதிரடி சோதனை நடத்தினர். இதில் சில முக்கிய ஆவணங்களை போலீசார் கைப்பற்றி விசாரணை நடத்தி வருகின்றனர்.  

நாகர்கோவில் கோட்டார் சமரச வீதியில் வசித்து வரும் ஸ்ரீஜித் என்பவர் 2009-ல் டி.என்.பி.எஸ்.சி. குரூப்-2 தேர்வு எழுதியிருந்தார். இவரது வீட்டில் இன்று லஞ்ச ஒழிப்பு போலீசார் அதிரடி சோதனை நடத்தினர்.

இதுபற்றி டி.எஸ்.பி. சுந்தர்ராஜ் கூறுகையில் “தற்போது ஸ்ரீஜித் வீட்டில் சோதனை நடந்து வருகிறது. உயர் அதிகாரிகள் கொடுக்கும் தகவலின்பேரில் அடுத்த கட்ட நடவடிக்கை மேற்கொள்ளப்படும்” என்றார்.  

வேலூர் மாவட்டத்தில் திருப்பத்தூர், ஆற்காடு ஆகிய இடங்களில் உள்ள டாக்டர்கள், வருவாய் துறையினர் வீடுகளில் சோதனை நடந்தது. திருப்பத்தூர் அருகே உள்ள ஜெயபுரம் கிராமத்தில் உள்ள வருவாய் ஆய்வாளர் பிரதாப் என்பவரது வீட்டில் சோதனை செய்தனர். இவர் கிருஷ்ணகிரி மாவட்டத்தில் பணிபுரிந்து வருகிறார்.

இதேபோல் ஆற்காடு வீட்டுவசதி வாரிய குடியிருப்பில் டாக்டர் பத்மா என்பவரது வீட்டிலும் நபீசாநகரில் டாக்டர் சுதா என்பவரது வீட்டிலும் லஞ்ச ஒழிப்பு போலீசார் சோதனை நடத்தினர்.  

கிருஷ்ணகிரி மாவட்டம் ஓசூரை அடுத்த மூக்காண்ட பள்ளியில் உள்ள இ.எஸ்.ஐ.மருத்துவமனையில் டாக்டராக பணிபுரிபவர் விஜயலட்சுமி. இவரது வீடு இ.எஸ்.ஐ. ஆஸ்பத்திரி வளாகத்தில் உள்ளது. இவரது வீட்டிலும் இன்று 3 பேர் அடங்கிய லஞ்ச ஒழிப்பு பிரிவு அதிகாரிகள் கொண்ட குழுவினர் சோதனை நடத்தினார்கள்.  

மதுரை மாவட்டத்தில் இன்று குரூப்-2 தேர்வில் வெற்றி பெற்றவர்கள் வீடுகளில் லஞ்ச ஒழிப்பு போலீசார் சோதனை நடத்தினர். மதுரை டி.எஸ்.பி. கலாவதி தலைமையில் 40-க்கும் மேற்பட்ட போலீசார் மதுரை எஸ்.ஆலங்குளம், கூடல்புதூர், நாராயணபுரம், உசிலம்பட்டி, சோழவந்தான் உள்பட 13 இடங்களில் போலீசார் சோதனை நடத்தினர்.

 

TNPSC ஊழல்: 73 இடங்களில் சோதனை

|  21 மாவட்டங்களில் 73 இடங்களில் சோதனை    தமிழ்நாடு அரசு பணியாளர் தேர்வாணையம் (டி.என்.பி.எஸ்.சி.) மூலம் அரசு பணியாளர்கள் தேர்வு செய்யப்படுகிறார்கள். இதில் ஏராளமான முறைகேடுகள் நடந்து இருப்பது தெரியவந்தது. பல் டாக்டர்கள், டி.எஸ்.பி.க்கள் உள்ளிட்ட பதவிகளுக்கு நியமனம் செய்யப்பட்டதில் பெருமளவில் ஊழல் நடந்து இருப்பது கண்டுபிடிக்கப்பட்டது.        இது தொடர்பாக லஞ்ச ஒழிப்பு போலீசார் ரகசிய விசாரணை நடத்தி அரசு பணியாளர் தேர்வாணைய தலைவர் செல்லமுத்து மற்றும் 13 உறுப்பினர்கள் வீடுகள், அலுவலகங்களில் சோதனை நடத்தினர். அப்போது முறைகேடுக்கான ஆவணங்கள், கட்டுகட்டாக பணம், ஹால்டிக்கெட்டுகள், பரிசு பொருள்கள், வெளிநாட்டு மது பாட்டில்கள் போன்றவை சிக்கின. அவை கோர்ட்டில் ஒப்படைக்கப்பட்டன.   2-வது கட்டமாக அரசு பணியாளர்கள் தேர்வாணைய அலுவலகத்திலும், அங்கு பணியாற்றும் அதிகாரிகள், ஊழியர்கள், கம்ப்யூட்டர் ஆபரேட்டர்கள் வீடுகளிலும் சோதனை நடத்தப்பட்டது.   இந்த கம்ப்யூட்டர்களை நிபுணர்கள் மூலம் ஆய்வு செய்து முறைகேடுகளை கண்டுபிடித்தனர்.  முக்கிய தகவல்கள் அடங்கிய கம்ப்யூட்டர் சர்வர் கைப்பற்றப்பட்டது.இதன் மூலம் யார்-யார்? தொடர்பு கொண்டு இருக்கிறார்கள், யாருக்கெல்லாம் தொடர்பு இருக்கிறது என்ற விவரங்கள் ஆய்வு செய்யப்பட்டது.    இதில் பணியாளர்கள் நியமனத்தில் இடைத்தரகர்களாக அரசு அதிகாரிகள், ஊழியர்கள், அரசியல் பிரமுகர்கள் செயல்பட்டு இருப்பது கண்டுபிடிக்கப்பட்டது. இதையடுத்து 3-வது கட்டமாக இடைத்தரகர்கள் வீடுகளில் சோதனை நடத்தி ஆவணங்களை கைப்பற்றினர்.  4-வது கட்டமாக இன்று தொடர் சோதனை மேற்கொள்ளப்பட்டது. பல்வேறு பணிகளுக்கான தேர்வுகளில் பங்குபெற்று தேர்வு எழுதியவர்களின் வீடுகள், அலுவலகங்களில் இந்த சோதனை நடைபெற்றது. இவர்கள் மீது தேர்வுகளில் வெற்றி பெற லஞ்சம் கொடுத்ததாக குற்றம் சாட்டப்பட்டது. இதையடுத்து தமிழ்நாடு முழுவதும் 21 மாவட்டங் களில் 73 இடங்களில் தேர்வு எழுதியவர்களின் வீடுகளில் லஞ்ச ஒழிப்பு போலீசார் சோதனை நடத்தினார்கள். அதிகாலையில் அதிகாரிகள் தலைமையில் லஞ்ச ஒழிப்பு போலீசார் பல்வேறு குழுக்களாக சென்று ஒரே நேரத்தில் இந்த சோதனை மேற்கொண்டனர்.   சென்னையில் 10 இடங்களில் சோதனை நடந்தது. வளசரவாக்கம் எஸ்.வி.எஸ். நகரில் அடுக்குமாடி குடியிருப்பில் 2 வீடுகளில் டி.எஸ்.பி. சரசுவதி தலைமையில் சோதனை நடந்தது. மதுரையில் 13 இடங்களிலும், காஞ்சீபுரத்தில் 3 இடங்களிலும், தஞ்சை- புதுக்கோட்டையில் தலா 5 இடங்களிலும், சேலம், வேலூர், சிவகங்கையில் 4 இடங்களிலும், திருச்சி, தேனி, தர்மபுரி, ஈரோடு நகரங்களில் 3 இடங்களிலும் சோதனை நடந்தது. அரசு பணியாளர் தேர்வாணையத்தில் நடைபெறும் தொடர் சோதனை தேர்வாணைய வட்டாரத்தில் பரபரப்பை ஏற்படுத்தியுள்ளது. மோசடியாக தேர்வு எழுதி பணி நியமனம் செய்யப் பட்டவர்கள் கலக்கம் அடைந்துள்ளனர். இதில் சம்பந்தப்பட்டவர்களின் பெயர் விவரங்களை லஞ்ச ஒழிப்பு போலீசார் வெளியிடாமல் ரகசியமாக வைத்து அடுத்தடுத்து அதிரடி சோதனை நடத்த திட்டமிட்டுள்ளனர். இதனால் பெரிய அளவில் பலர் சிக்குவார்கள் என்று தெரிகிறது.   அதே நேரம் நேர்மையான முறையில் தேர்வெழுதும் மாணவர்கள் இனி நல்லதொரு எதிர்காலம் உள்ளதாக நினைக்கின்றனர். ஏற்கனவே நடந்த சோதனையின் அடிப்படையில் தேர்வாணைய தலைவர் மற்றும் உறுப்பினர்கள் மீது ஊழல் தடுப்பு சட்டத்தின் கீழ் பல்வேறு பிரிவுகளில் வழக்குப் பதிவு செய்யப்பட்டுள்ளது. தேர்வு செய்யப்பட்ட விண்ணப்பதாரர்களின் பெயர் பட்டியலை அதிகாரப் பூர்வமாக வெளியிடுவதற்கு முன் அவர்களை நேரில் சந்தித்தும், தவறான வழியிலும் லஞ்சம் பெற முயற்சி செய்தது, மோட்டார் வாகன ஆய்வாளர் காலி பணியிடங்களில் தகுதியற்ற பணியாளர்களை தேர்வு செய்ததன் மூலம் முறைகேட்டில் ஈடுபட்டது,  லஞ்ச ஊழல் முறைகேடுகளை தடுக்க முயன்ற தேர்வாணைய அலுவலரான ஐ.ஏ.எஸ். அதிகாரியை செயல்படவிடாமல் தடுத்தல், விசாரணைக்காக ஆவணங்களை தர மறுத்து அதிகார துஷ்பிரயோகம் செய்தல் ஆகிய குற்றச்சாட்டுகளின் கீழ் வழக்கு பதிவு செய்யப்பட்டுள்ளது. லஞ்ச ஒழிப்பு போலீசார் விசாரணை குறித்த தொலைகாட்சி செய்திகளைக் காண :http://www.youtube.com/watch?v=v9PHxPKCc5M&feature=related

குரூப்-1: DSP-க்கள் பணி நியமனம்

குரூப்-1 தேர்ச்சி : DSP-க்கள் பணி நியமனம் 

       TNPSC குரூப் -1 தொகுதியில் அடங்கிய DSP பணிக்கு கடந்த  2011 -ஆம்  ஆண்டு ஜனவரி மாதம் முதன்மை எழுத்துத் தேர்வும், ஜூன் மாதம் நேர்முகத்தேர்வும் நடைபெற்றது . அதில் தேர்ச்சி பெற்றவர்களுக்கு பணி நியமனமும் பயிற்சியும் வழங்குவது தொடர்பான கோப்பு நவம்பர் 2011 -ல் மாண்புமிகு முதல்வருக்கு அனுப்பப்பட்டு ஒப்புதலுக்காக நிலுவையில் இருந்தது. தற்போது முதல்வரின் ஒப்புதல் பெறப்பட்டு பணி நியமன ஆணையும், பயிற்சி தொடக்கம் குறித்த அறிவிப்பும் தேர்ச்சி பெற்றவர்களுக்கு அனுப்பப்பட்டுள்ளது. அதன்படி வரும் 2012   ஜனவரி. 13  முதல் DSP பணிக்கு தேர்ச்சி பெற்றவர்களுக்கு சென்னையை அடுத்த வண்டலூரில் பயிற்சி ஆரம்பமாகிறது. 

        எனினும் DEPUTY COLLECTOR பதவிக்கு தேர்ச்சி பெற்றவர்களுக்கு பணி நியமனம் வழங்குவது தொடர்பான கோப்பு இன்னமும் முதல்வரின் ஒப்புதலுக்காக நிலுவையில் உள்ளது. விரைவில் அக்கோப்பும் முதல்வரின் ஒப்புதலைப் பெறும் என்று தெரிகிறது.

    

 

DIET-ல் விரிவுரையாளர் பணி

    ஆசிரியர் கல்வி பயிற்சி நிறுவனத்தில் விரிவுரையாளர் பணி

 தமிழ்நாட்டில் 32 மாவட்டங்களில் உள்ள ஆசிரியர் கல்வி பயிற்சி நிறுவனத்தில் 34 சீனியர் விரிவுரையாளர் பதவிக்கான எழுத்துத்தேர்வு வரும் மார்ச் மாதம் 4-ம் தேதி நடைபெறவுள்ளது என ஆசிரியர் தேர்வு வாரியம் அறிவித்துள்ளது. இப்போட்டிதேர்விற்கு தகுதியானவர்களிடமிருந்து விண்ணப்பங்கள் வரவேற்கப்படுகின்றன.

        போட்டித் தேர்வுக்கான விண்ணப்பம் அந்தந்த மாவட்ட முதன்மைக் கல்வி அலுவலகத்தில் விநியோகம் செய்யப்படுகிறது. விண்ணப்பத்தின் விலை ரூ.50.
   தேர்வுக் கட்டணம்: பொதுப் பிரிவினருக்கு ரூ.500, ஆதிதிராவிடர், பழங்குடியினர், மற்றும் மாற்றுத் திறனாளிகளுக்கு ரூ.250.

          தேர்வு கட்டணத்தை டி.டி.யாக ஆசிரியர் தேர்வு வாரியம், சென்னை என்ற முகவரிக்கு பாரத ஸ்டேட் பாங்க், இந்தியன், ஐ.ஒ.பி, கார்ப்பரேஷன், கனரா வங்கிகளில் மட்டுமே எடுக்க வேண்டும்.

    பூர்த்தி செய்யப்பட்ட விண்ணப்பத்தை, விண்ணப்பதாரர்கள் அந்தந்த மாவட்ட முதன்மைக் கல்வி அலுவலகத்தில் வரும் 23-ம் தேதி மாலை 5.45 மணிக்குள் நேரடியாக வழங்க வேண்டும் என ஆசிரியர் தேர்வு வாரியம் அறிவித்துள்ளது.

வி.ஏ.ஓ. பணி - உயர் நீதிமன்றம் உத்தரவு

வி.ஏ.ஓ. பணி - தமிழக அரசுக்கு உயர் நீதிமன்றம் உத்தரவு

கிராம நிர்வாக அலுவலர் (வி.ஏ.ஓ.) பணிக்குத் தேர்வு செய்யப்பட்ட அனைவருக்கும் பணி நியமன ஆணையை அனுப்ப வேண்டும் என்று தமிழக அரசுக்கு சென்னை உயர் நீதிமன்றம் உத்தரவிட்டது.  பின்னடைவு காலிப் பணியிடங்களை நிரப்புதல் என்ற பெயரில், இடஒதுக்கீட்டு சதவீதத்தை விட கூடுதலான இடங்கள் தாழ்த்தப்பட்ட மற்றும் பழங்குடியினர் பிரிவினருக்கு ஒதுக்கப்பட்டுள்ளதாகக் கூறி, சென்னை செங்குன்றத்தைச் சேர்ந்த கே. ராதா உள்ளிட்டோர் உயர் நீதிமன்றத்தில் மனு தாக்கல் செய்தனர்.  

 

           இந்த மனுக்கள் மீது விசாரணை நடத்திய நீதிபதி கே. சுகுணா பிறப்பித்த உத்தரவு:  கிராமப்புற வளர்ச்சிப் பணிகளுக்கு கிராம நிர்வாக அலுவலர்களின் பணி என்பது மிகவும் முக்கியமானதாகும். இந்நிலையில், காலியாக உள்ள வி.ஏ.ஓ. பணியிடங்களை நிரப்பிட தேர்வு நடத்தப்பட்டு, பணிக்கு தேர்ந்தெடுக்கப்பட்டவர்களின் பட்டியலும் வெளியிடப்பட்டு விட்டது.  எனவே, வி.ஏ.ஓ. பணிக்குத் தேர்வு செய்யப்பட்ட அனைவருக்கும் பணி நியமண ஆணையை நான்கு வாரத்துக்குள் அனுப்ப தமிழக அரசு நடவடிக்கை எடுக்க வேண்டும்.  இட ஒதுக்கீட்டு அளவுக்கு மேல் தாழ்த்தப்பட்டவர்கள் மற்றும் பழங்குடியினருக்கு பணியிடங்கள் ஒதுக்கப்பட்டுள்ளதா என்பது பற்றி இந்த வழக்கின் இறுதி விசாரணையின்போது ஆராய்ந்து, முடிவு செய்து கொள்ளலாம். ஒருவேளை கூடுதல் இடங்கள் ஒதுக்கப்பட்டிருந்தாலும் கூட, எதிர்காலத்தில் வி.ஏ.ஓ. தேர்வு நடைபெறும்போது அதனை சரி செய்து கொள்ளலாம் என்று நீதிபதி தனது உத்தரவில் கூறியுள்ளார்.  மனுதாரர்கள் தாக்கல் செய்துள்ள மனுக்களில், கடந்த 2007 - 2008-ம் ஆண்டில் 2,500 வி.ஏ.ஓ.க்கள் பணியில் நியமிக்கப்பட்டனர். அதன் பின்னர் பின்னடைவு காலிப் பணியிடங்கள் என்ற அடிப்படையில் 197 இடங்கள் மட்டுமே தாழ்த்தப்பட்டவர்கள் மற்றும் பழங்குடியினர் பிரிவினருக்கு ஒதுக்கீடு செய்ய வேண்டியிருந்தது.  இந்நிலையில், கடந்த 21.7.2010 அன்று தமிழக அரசு வெளியிட்ட அறிவிக்கையில் 1,077 வி.ஏ.ஓ. பணியிடங்கள் பின்னடைவு இடங்கள் என்ற அடிப்படையில் தாழ்த்தப்பட்டோர் மற்றும் பழங்குடியினருக்கு ஒதுக்கப்பட்டுள்ளன. இந்த ஒதுக்கீடு சட்ட விரோதமானதாகும். எனவே, இதற்கு தடை விதிக்க வேண்டும் என்று மனுதாரர்கள் கோரியிருந்தனர்.  

 

            இது தொடர்பாக தமிழக அரசின் தலைமை வழக்குரைஞர் நீதிமன்றத்தில் தாக்கல் செய்த அறிக்கையில், தாழ்த்தப்பட்டோருக்கு 18 சதவீதம் மற்றும் பழங்குடியினருக்கு 1 சதவீதம் இடஒதுக்கீடு என்ற அடிப்படையில், இன்னும் 1,232 இடங்களில் தாழ்த்தப்பட்டோர் மற்றும் பழங்குடியின பிரிவைச் சேர்ந்தவர்களை நியமிக்க வேண்டியுள்ளது என்று கூறியிருந்தார்.  எனினும், மனுதாரர்கள் தரப்பு வழக்குரைஞர்கள் இதற்கு எதிர்ப்புத் தெரிவித்தனர். அரசு தலைமை வழக்குரைஞர் தவறான புள்ளி விவரங்களை அளித்துள்ளதாக கூறினார்கள்.  அனைத்து தரப்பு வாதங்களையும் கேட்ட நீதிபதி, ஏற்கெனவே தேர்வு செய்யப்பட்டவர்களுக்குப் பணி நியமன ஆணை அனுப்பப்பட வேண்டும் என்றும், வழக்கின் இறுதி விசாரணை பிப்ரவரி முதல் வாரத்தில் நடைபெறும் என்றும் உத்தரவிட்டார்.

TRB - 24000 ஆசிரியர்கள் நியமனம்

B.Ed பட்டதாரிகள் மகிழ்ச்சி .

             ஆசிரியர் தேர்வு வாரியம் மூலம் இந்த ஆண்டு (2011-12) மொத்தம் 24 ஆயிரத்து 17 ஆசிரியர்களை நியமிக்க தமிழக அரசு அரசாணையை வெளியிட்டுள்ளது.  ஆசிரியர் நியமனப் பணிகளை பிப்ரவரி மாதத்திலேயே தொடங்க ஆசிரியர் தேர்வு வாரியம் திட்டமிட்டுள்ளது.  பள்ளிக் கல்வித் துறையில் ஆசிரியர்கள் உள்பட மொத்தம் 55 ஆயிரம் பேர் இந்த ஆண்டு நியமிக்கப்படுவார்கள் என்று முதல்வர் ஜெயலலிதா சட்டப்பேரவையில் அறிவித்திருந்தார்.  அதைத் தொடர்ந்து, "அனைவருக்கும் இடைநிலைக் கல்வி" எனும் திட்டத்தின் கீழ் சுமார் 8 ஆயிரம் ஆசிரியர் பணியிடங்களை கூடுதலாக உருவாக்க உத்தரவிடப்பட்டது.  இவற்றில் 16 ஆயிரம் பகுதிநேர ஆசிரியர்களை நியமிக்கும் பணிகள் மாவட்ட அளவில் இப்போது நடைபெற்று வருகின்றன.  மீதமுள்ள பணியிடங்கள்: இளநிலை உதவியாளர் உள்ளிட்ட மீதமுள்ள பணியிடங்கள் பள்ளிக் கல்வித் துறையால் அடுத்தகட்டமாக நிரப்பப்படும் எனத் தெரிகிறது.  ஆசிரியர் தேர்வு வாரியம் மூலம் மொத்தம் எவ்வளவு ஆசிரியர்கள் நியமிக்கப்படுவார்கள் என்ற விவரம் இதுவரை அறிவிக்கப்படாமல் இருந்தது. தமிழக அரசின் உத்தரவின் மூலம் மொத்தம் 24,017 ஆசிரியர்கள் இந்த ஆண்டு நியமிக்கப்பட உள்ளது உறுதியாகியுள்ளது. 

             முதுநிலை பட்டதாரி ஆசிரியர்கள், பட்டதாரி ஆசிரியர்கள் ஆகியோர் எழுத்துத் தேர்வின் மூலம் நியமிக்கப்படுவர். ஆசிரியர் தகுதித் தேர்வில் தேர்ச்சி பெறும் பட்டதாரி ஆசிரியர்கள் மட்டுமே எழுத்துத் தேர்வுக்கு அனுமதிக்கப்படுவர்.  உச்ச நீதிமன்றத் தீர்ப்பு வரும் வரை, இடைநிலை ஆசிரியர்கள் வேலைவாய்ப்பு அலுவலகப் பதிவுமூப்பின் அடிப்படையில் நியமிக்கப்படுவர்.  ஜூன் மாதத்துக்குள் நியமனம்: இந்த ஆசிரியர்களை நியமிப்பதற்கான பணிகள் பிப்ரவரி மாதம் தொடங்க உள்ளதாக தகவலறிந்த வட்டாரங்கள் தெரிவித்தன. பிப்ரவரி மாதத்தில் தொடங்கி ஜூன் மாதத்தில் இந்தப் பணிகள் அனைத்தும் நிறைவடையும் எனவும் அந்த வட்டாரங்கள் தெரிவித்தன.  பிப்ரவரியில் தேர்வு: 34 உதவித் தொடக்கக் கல்வி அலுவலர் பணியிடங்களுக்கு மொத்தம் 67 ஆயிரம் பேர் விண்ணப்பித்துள்ளனர்.  இதற்கான எழுத்துத் தேர்வு ஜனவரி 8-ம் தேதி நடைபெற இருந்தது. பின்னர் இந்தத் தேர்வு தேதி குறிப்பிடாமல் ஒத்திவைக்கப்பட்டது. இந்தத் தேர்வு பிப்ரவரி 19 அல்லது 26-ம் தேதி நடைபெறும் எனக் கூறப்படுகிறது. ஆசிரியர் கல்வி ஆராய்ச்சி மற்றும் பயிற்சி இயக்ககத்துக்காக 34 மூத்த விரிவுரையாளர்கள் நியமிக்கப்பட உள்ளனர். இதற்கான தேர்வு மார்ச் மாதம் நடைபெறும். இப்போது விண்ணப்பங்கள் விநியோகிக்கப்பட்டு வருகின்றன.  அரசுப் பொறியியல் கல்லூரிகளுக்கு 156 உதவிப் பேராசிரியர்கள் எழுத்துத் தேர்வின் மூலம் நியமிக்கப்பட உள்ளனர். இதுதொடர்பான அறிவிப்பு அடுத்த வாரம் வெளியாகும். இதற்கான எழுத்துத் தேர்வு ஏப்ரலில் நடைபெறும் எனத் தெரிகிறது.   

 நியமிக்கப்பட உள்ள ஆசிரியர்கள் எண்ணிக்கை:  

முதுநிலை பட்டதாரி  ஆசிரியர்கள்        - 2,895 

 பட்டதாரி ஆசிரியர்கள்                            - 14,761 

இடைநிலை ஆசிரியர்கள்                        - 5,451  

சிறுபான்மை பாட ஆசிரியர்கள்              - 32 

 உடற்கல்வி ஆசிரியர்கள்                        - 687   

தையற்கலை ஆசிரியர்கள்                      - 47  

இசை ஆசிரியர்கள்                                   - 41  

ஓவிய ஆசிரியர்கள்                                  - 78  

விவசாய ஆசிரியர்கள்                             - 25  

மொத்தம்                                                   - 24,017

TNPSC - புதிய அறிவிப்புகள் எப்போது?

| : Email this Article எதிர்பார்க்கப்படும் அறிவிப்புகள்!          டி,என்.பி.எஸ்.சி. முடக்கப்பட்டுவிட்டது. இனி எந்த தேர்வுக்கான அறிவிப்பும் வெளிவராது என பரவலாக பேசப்படுகிறது. அது உண்மையல்ல. வழக்கு முடிந்ததும் புதிய தேர்வுக்கான அறிவிப்புகளை எதிர்பார்க்கலாம். இதை உறுதிபடுத்த, ஜெயலலிதா முதல்வரான பின்னர் அமைச்சரவையில் அளிக்கப்பட்ட அறிக்கையில் உள்ள டி.என்.பி.எஸ்.சி. பற்றிய விவரத்தை இங்கு அப்படியே தருகிறேன். "தமிழ்நாடு அரசுப் பணியாளர் தேர்வாணையம், தன்னாட்சி அமைப்புடன் தனது பணிகளைச் சுயமாகவும், நேர்மை யாகவும், பாகுபாடின்றியும் செயல்படுத்தும் வகையில், இந்திய அரசியலமைப்புச் சட்டப் பிரிவுக் கூறு 315(1)-ன் கீழ் அமைக்கப்பட்டுள்ளது. இத்தேர்வாணையம், தலைவர் மற்றும் பதினான்கு உறுப்பினர்களைக் கொண்டதாகும். இத்தேர்வாணையத்தின் தலைவர், உறுப்பினர்கள் மற்றும் பணியாளர்கள் ஆகியோரின் பணி நிலைகள், 1954-ஆம் ஆண்டைய தமிழ்நாடு அரசுப் பணியாளர் தேர்வாணைய ஒழுங்குமுறை விதிகளுக்கு உட்பட்டவையாகும். தமிழ்நாடு அரசுப் பணியாளர் தேர்வாணையம், இந்திய அரசியலமைப்புச் சட்டப் பிரிவுக் கூறு 320-ல் கூறப்பட்டுள்ள கீழ்க்கண்ட கடமைகள் மற்றும் அலுவல் பணிகளை மேற்கொண்டு வருகிறது:- (1) பணியாளர்களைத் தெரிவு செய்தலே இதன் தலையாய பணியாகும்; (2) பணியாளர்களைத் தெரிவு செய்தல் பற்றிய விதிகள் இயற்றுவது, பணி நியமனம் மற்றும் பதவி உயர்வுகள் அளித்தல், ஒரு பணியிலிருந்து மற்றொரு பணிக்கு மாற்றல் செய்தல் ஆகியவற்றில் பின்பற்றப்பட வேண்டிய நெறிகள், அரசுப் பணியாளர்களின் ஒழுங்குமுறை நடவடிக்கைகள் மீதான மேல்முறையீடு குறித்த அனைத்து தேர்வு களிலும் அரசுக்கு ஆலோசனை வழங்குதல்; (3) அரசுப் பணியாளர்களுக்கான துறைத் தேர்வுகளை நடத்துதல்; (4) டேராடூன் இந்திய இராணுவக் கல்லூரி நுழைவுத் தேர்வுகளை ஆண்டிற்கு இருமுறை, மத்திய அரசின் பாதுகாப்பு அமைச்சகத்தின் சார்பாக நடத்துதல். 01.04.2010 முதல் 31.03.2011 வரையுள்ள காலத்தில், 63 வகையான பணியிடங்களில் 9,183 காலிப் பணியிடங்களுக்கு 12 அறிவிக்கைகள் வெளியிடப்பட்டன. இக்காலிப் பணியிடங்களுக்கு 16,84,745 விண்ணப்பங்கள் பெறப்பட்டன அக்காலத்தில், 12 பதவி இனங்களுக்கு இறுதித் தெரிவு முடிவுகள் வெளியிடப்பட்டு, 3,512 நபர்கள் தெரிவு செய்யப்பட்டனர். அத் தெரிவுப் பட்டியல்கள் தொடர்புடைய துறைகளுக்கு பணிநியமனம் வழங்க அனுப்பப் பட்டன. அக்காலத்தில் மாநிலப்பணிகளில் தொடர்புடைய சார்நிலைப் பணிகளிலிருந்து பணிமாறுதல் மூலம் தெரிவு செய்தல், மாநிலப் பணிகளிலேயே பதவி உயர்வு வழங்குதல் ஆகிய பொருள் குறித்த அரசின் கருத்துருக்கள், துறைத்தேர்வுக்குழுவால் அவ்வப்போது ஆய்வு செய்யப்பட்டு 1,165 அலுவலர்கள் பதவி உயர்வு பெறப் பரிந்துரை செய்யப்பட்டனர். ஒழுங்கு நடவடிக்கை தொடர்பான பொருட்கள் மற்றும் பல்வேறு பணிகளில் வகைப்படுத்தப்பட்டுள்ள பணியிடங்களுக்குத் தற்காலிக/சிறப்பு விதிகளை உருவாக்குதல் மற்றும் அவற்றிற்கான திருத்தங்கள் வெளியிடுதல் தொடர்பாக அரசு அனுப்பும் கருத்துருக்களில் தேர்வாணையம் தனது கருத்தைத் தெரிவிக்கிறது. மேலும், தேர்வாணை யத்தால் தெரிவு செய்யப்படாத இனங்களில் துறைத்தலைவர்களாலும், அரசாலும் பணி யமர்த்தம் செய்யப்பட்ட இனங்களுக்கு இசை வளிக்கிறது. அரசுப் பணியாளர்களுக்கான துறைத்தேர்வுகளையும் நடத்துகிறது. 2011- 12 -ஆம் ஆண்டில், தொகுதி-1க்கான பூர்வாங்கத் தேர்வு 2011, ஜூன் மாதமும், அவ்வாண்டிற்கான ஒருங்கிணைந்த சார்நிலைப்பணிகள் தேர்வு-1க்கான தேர்வு 2011, ஜூலை மாதமும் நடைபெற்றன. மேலும், இந்து சமய அறநிலைய ஆட்சித்துறையில் உரிமையியல் நடுவர், செயல் அலுவலர் நிலை-1, நிலை-111 மற்றும் நிலை-4 ல் அடங்கிய பதவிகளுக்கான தேர்வுகள், புள்ளியல் ஆய்வாளர், உதவிப் புள்ளியல் ஆய்வாளர், இளநிலைப் பகுப்பாய்வாளர், பீனைல் உதவியாளர், மண்ணியல் உதவியாளர் ஆகிய பதவிகளுக்கும், தொகுதி-1, ஒருங்கிணைந்த சார்நிலைப் பணிகள்-1, ஒருங்கிணைந்த சார்நிலைப் பணிகள்-11 மற்றும் தொகுதி-4 இல் அடங்கிய பதவிகளுக்கான தேர்வு களுக்கான அறிவிக்கைகள் வெளியிடப்பட உள்ளன. கிராம நிர்வாக அலுவலர் பணி யிடத்திலுள்ள 3,484 காலிப்பணியிடங்களை நிரப்ப நடத்தப்பட்ட போட்டித் தேர்வில், பணியிடங்களுக்கான முடிவுகள் வெளியிடப் பட்டன. ஒருங்கிணைந்த சார்நிலைப் பணிகள் தேர்வு-1ல் அடங்கியுள்ள 1,628 காலியிடங் களுக்கான தெரிவுப் பணிகள் முடிவடையும் நிலையில் உள்ளன. தற்போது, தேர்வாணைய அலுவலகம், வணிகவரி அலுவலக இணைப்புக் கட்டடம், கிரீம்ஸ் சாலை, கோயம்பேடு தெற்காசிய விளையாட்டு கிராமம் மற்றும் அரசினர் தோட்டத்திலுள்ள இராஜாஜி மண்டபம் ஆகிய 3 இடங்களில் செயல்பட்டு வருகின்றது. தேர்வாணைய அலுவலகத்திற்கென ஒரு சொந்த அலுவலகக் கட்டடம், சென்னை எம்.யூ.சி திடலில் கட்டப்பட்டு வருகின்றது' ஆக புதிய எழுச்சியுடன் டி.என்.பி.எஸ்.சி தேர்வுகளை ஜெயலலிதா அரசு நடத்த உள்ளது  என்பதை அதிமுக அமைச்சரவையின் அறிக்கையிலிருந்து தெரியவருகிறது. அதனால் நம்பிக்கையுடன் இருங்கள்.  புதிய அறிவிப்புகள் வெளிவரும். * TNPSC குரூப் I தேர்வு டி.என்.பி.எஸ்.சி நடத்தும் குரூப் I தேர்வு மூலம் துணை ஆட்சியர், துணை காவல் கண்காணிப்பாளர், வணிகவரி அலுவலர், மாவட்டப் பதிவாளர், கோட்ட வளர்ச்சி அலுவலர், கூட்டுறவுச் சங்கங்களின் துணைப் பதிவாளர், மாவட்ட வேலைவாய்ப்பு  அலுவலர், கோட்ட தீயணைப்பு அலுவலர் போன்ற உயர் பணிகளுக்கான தகுதிவாய்ந்த நபர்களை தேர்ந்தெடுக்கின்றது. இத்தேர்வினை எழுத ஏதேனும் ஓர் பட்டப்படிப்பு  போதுமானது. குறைந்த பட்சம் 21 வயது பூர்த்தியாகியிருக்க வேண்டும். அதிக பட்ச வயது பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், அட்டவணை வகுப்பினர், அட்டவணை பழங்குடியினர் ஆகியோருக்கு 35 வயது. இதர வகுப்பினருக்கு 30 வயது ஆகும். இத்தேர்வானது மூன்று கட்டங்களாக நடத்தப்படுகிறது. அவை 1. முதல்நிலைத் தேர்வு, 2.முதன்மைத் தேர்வு, 3. நேர்முகத் தேர்வு ஆகும். முதல்நிலைத் தேர்வு எழுதுபவர்களில் முதன்மைத் தேர்வுக்கு 1:10 என்ற விகிதத்தில் தேர்ந்தெடுக்கப்படுவர். முதன்மைத் தேர்வு எழுதுபவர்களில் 1:2 என்ற விகிதத்தில் நேர்முகத் தேர்வுக்குத் தேர்ந்தெடுக்கப்படுவர். * TNPSC  குரூப் II தேர்வு டி.என்.பி.எஸ்.சி நடத்தும் குரூப்-II தேர்வானது ஒருங்கிணைந்த சார்நிலைப் பணி-I எனப்படுகிறது. இந்த தேர்வின் மூலம் தலைமைச் செயலகத்தில் உதவிப் பிரிவு   அலுவலர்  (ASO) வருவாய்த் துறையில் உதவியாளர், இந்து சமய அறநிலையத் துறையில் உதவி தணிக்கை ஆய்வாளர், உதவி தொழிலாளர் ஆய்வாளர், பேரூராட்சி செயல் அலுவலர் தரம்-2, உள்ளாட்சி தணிக்கைத் துறையில் உதவி ஆய்வாளர், சார்பதிவாளர் தரம்-2, உதவி வணிக வரி அலுவலர், இளநிலை கூட்டுறவு தணிக்கையாளர், இளநிலை வேலைவாய்ப்பு அலுவலர். இத்தேர்வை பட்டப்படிப்பை முடித்தவர் யாரும் எழுதலாம். இத்தேர்விற்கான கல்வி தகுதியானது குறைந்தபட்ச பட்சம் 18 வயது பூர்த்தியாயிருக்க வேண்டும். சார்பதிவாளர் (நிலை-II) பதவிக்கு 20 வயது பூர்த்தியாயிருக்க வேண்டும். அதிக பட்ச வயது: பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர்,  அட்டவணை வகுப்பினர், அட்டவணை பழங் குடியினர் ஆகியோருக்கு உச்ச வயது வரம்பு இல்லை. ஆனாலும் இளநிலை வேலைவாய்ப்பு அலுவலர் மற்றும் நன்னடத்தை அலுவலர் ஆகிய பதவிகளுக்கு 40 வயது பூர்த்தி யாகியிருக்கக்கூடாது இதர வகுப்பினருக்கு அனைத்துப் பணியிடங்களுக்கும் உச்சவயது 30 ஆகும். இந்த தேர்வானது எழுத்துத் தேர்வு மற்றும் நேர்முகத் தேர்வு என இரண்டு கட்டங்களாக நடத்தப்படுகிறது. * TNPSC  குரூப் IV தேர்வு டி.என்பிஎஸ்.சி நடத்தும் குரூப்- IV தேர்வானது இளநிலை உதவியாளர், சர்வேயர், தட்டச்சர், சுருக்கெழுத்துத் தட்டச்சர் தரம்-3 ஆகிய பணிகளுக்காக நடத்தப்படுகிறது. இதற்கான கல்வி தகுதி பத்தாம் வகுப்பு தேர்ச்சி. வயது வரம்பு என்று பார்த்தால் இள நிலை உதவியாளர், தட்டச்சர், சுருக்கெழுத்துத் தட்டச்சர், சர்வேயர் ஆகிய பணியிடங்களுக்கு குறைந்தபட்ச வயது 18. அதிகபட்ச வயது 30 ஆகும். பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், அட்டவணை வகுப்பினர், அட்டவணை பழங்குடியினர் ஆகியோருக்கு உச்சவயது வரம்பு இல்லை. * இந்து சமய அறநிலையத்துறை பணிகள் தமிழக அரசின் இந்து சமய அறநிலையத்துறை பணிகளுக்கான தேர்வை டி.என்.பி.எஸ்.சி தொடர்ந்து அவ்வப்போது நடத்தி வருகிறது. அவற்றில் முக்கியமான தேர்வுகள் 1. டி.என்.பி.எஸ்.சி குரூப் I B  தேர்வு, 2. டி.என்.பி.எஸ்.சி குரூப் IV  (நிர்வாக அலுவலர் தரம் - I) தேர்வு, 3. டி.என்.பி.எஸ்.சி குரூப் VII தேர்வு, 4.டி.என்.பி.எஸ்.சி குரூப் VIII தேர்வு ஆகியவை நடத்தப்படுகின்றன. * டி.என்.பி.எஸ்.சி குரூப்-I B  தேர்வானது இந்து சமய அறநிலையத் துறையில் உதவி ஆணையர் பதவிக்காக நடத்தப்படுகிறது. இதற்கான கல்வித் தகுதி ஏதேனும் ஓர் பட்டப்படிப்பு மற்றும் சட்ட படிப்பு ஆகும். வயது வரம்பு: குறைந்தபட்சம் 21 வயது பூர்த்தியாயிருக்க வேண்டும். அதிகபட்ச வயது 32 ஆகும். பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், அட்ட வணை வகுப்பினர், அட்டவணை பழங்குடி யினர் ஆகியோருக்கு 37 வயது இதற்கான எழுத்து தேர்வு தாள்1 பொதுத்தமிழ் அல்லது பொது ஆங்கிலம் 100 வினாக்கள். பொது அறிவு 100 வினாக்கள் தாள் 2 இல் இந்து சமய 100 வினாக்கள், சட்டப் பாடத்தில் 100 வினாக்கள் கேட்கப்படும் ஒரே நாளில் இரண்டு தேர்வுகளாக காலையும் மாலையும் நடத்தப்படும். * டி.என்.பி.எஸ்.சி குரூப் VII-A தேர்வில் ஒன்று இந்து சமய அறநிலையத் துறையில் நிர்வாக அலுவலர் தரம்-I பதவிக்காக நடத்தப்படுகிறது. இத்தேர்விற்கான கல்வித் தகுதி ஏதேனும் ஓர் பட்டப்படிப்பு மற்றும் சட்டப்படிப்பு. வயது வரம்பு: குறைந்த பட்ச வயது 25, அதிகபட்ச வயது 35. பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், அட்டவணை வகுப்பினர், அட்ட வணை பழங்குடியினர் ஆகியோருக்கு உச்சவயது வரம்பு இல்லை. இத்தேர்விற்கான தேர்வு முறை தாள் 1-இல் பொது அறிவு மற்றும் பொதுத்தமிழ் அல்லது பொது ஆங்கிலம், தாள் 2 இல் இந்து சமய வினாக்கள் மற்றும் சட்டம் வினாக்கள் இடம்பெறும்.  அடுத்து நேர்முகத்தேர்வு நடத்தப்படும். * டி.என்.பி.எஸ்.சி குரூப் VII-B  தேர்வில் இரண்டாவது இந்த சமய அறநிலையத் துறையில் நிர்வாக அலுவலர் தரம்-III பதவிக்காக நடத்தப்படுகிறது. இத்தேர்விற்கான கல்வித் தகுதி ஏதேனும் ஓர் பட்டப்படிப்பு வயது வரம்பு: குறைந்தபட்ச வயது 25. அதிக பட்ச வயது 35. பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர்,  அட்டவணை வகுப்பினர், அட்டவணை பழங்குடியினர் ஆகியோருக்கு உச்சவயது வரம்பு இல்லை. இத்தேர்வுக்கான எழுத்துத் தேர்வு தாள் 1-இல் பொது அறிவு மற்றும் பொதுத்தமிழ், தாள் 2-இல் இந்து சமய இணைப்பு விளக்கம் மற்றும் சைவமும் வைணவமும். எழுத்துத் தேர்வில் வெற்றிப் பெற்றவர்களுக்கு நேர்முகத் தேர்வு நடத்தப் படுகிறது. * டி.என்.பி.எஸ்.சி குரூப் VIII  தேர்வானது இந்து சமய அறநிலைத்துறையில் நிர்வாக அலுவலர் தரம் -IV பணிக்காக நடத்தப்படுகிறது. இத்தேர்விற்கான கல்வித்தகுதி 10-ஆம் வகுப்பு தேர்ச்சி மட்டுமே. வயது வரம்பு: குறைந்த பட்ச வயது 25 அதிகபட்ச வயது 35 ஆகும். பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், அட்டவணை வகுப்பினர், அட்டவணை பழங்குடியினர் ஆகியோருக்கு உச்சவயது வரம்பு இல்லை. இதற்கான எழுத்து தேர்வு முறையானது. தாள் 1-இல் பொது அறிவு மற்றும் பொதுத்தமிழ், தாள் ஒஒ-இல் இந்து சமய இணைப்பு விளக்கம் மற்றும் சைவமும் வைணவமும். அடுத்து இதற்கான நேர்முகத்தேர்வு நடத்தப்படும். * தமிழ்நாடு பொது சார்நிலைப் பணி (புள்ளியல் துறை) தேர்வானது, உதவி புள்ளியியல் ஆய்வாளர் பதவிக்காக நடத்தப்படுகிறது. இத்தேர்வினை கணிதம் அல்லது பொருளாதாரம் அல்லது புள்ளியல் பட்டப்படிப்பு முடித்தவர்கள் எழுதலாம். இத்தேர்விற்கான குறைந்தபட்ச வயது 20. அதிகபட்ச வயது 30 ஆகும். பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், அட்டவணை வகுப்பினர், அட்டவணை பழங்குடியினர் ஆகியோருக்கு உச்சவயது வரம்பு இல்லை. எழுத்து தேர்வு (விண்ணப்பதாரால் தேர்வு செய்யப்படும் கணிதம் அல்லது புள்ளியியல் அல்லது பொருளாதாரப் பாடத்தில்) 200 கேள்விகள் கேட்கப்படும். இதில் வெற்றிப்பெற்றவர்களுக்கு நேர்முகத்தேர்வு நடத்தப்படும். - எஸ். செல்வராஜ்